+0 به یه ن
ویر خبر قارداش دایانسون بو غریبون كاروانی
اندیرون یكسر بو یرده عترت آل عبانی
كربلا چوخ باصفا دور
كربلا كوی وفا دور
شیعه‌نین ورد زبانی
كربلا دور كربلا دور
گرچی قربانگاه اصلی روز ازلدن منا دور
بو یرون وار اختصاصی منبع فیض خدا دور
طور سینا دور بو صحرا یا دیار كربلا دور
دولدوروب صوت اناالحق بو دیار غم فزانی
وار خلیلون افتخاری بیر فدا كسدی مناده
من گرگ یتمیش ایكی قربان ویرم بو نینواده
بو هوای عشقیله باشیم گزر نوك جداده
زینبیم اَرِنی دینده سسلرم من لَن ترانی
بو همان یردور كه جدّیم ایلیوب اوّلده اعلان
سویولون باغلار یوزیمه ظلم الیله آل سفیان
اصغریم قنداق ایچینده اوخلانار عطشان ویرر جان
سرخ رنگ ایلر بوغازیندن آخان قان آسمانی
زینبه بولدورمه قارداش یتمشوخ كرب و بلایه
گر ایشیدسه نینوا آدین گلر نی تك نوایه
چون بولور گوگلی بویرده توش اولار تیر بلایه
قولّارین باغلار اراذل اوج ایدر عرشه فغانی
سینمه دشمن بو چولده داغی داغ اوستن چكللر
سن كیمی قارداش غمینده قدیمی قارداش بوكللر
حقی اثبات ایتماق اوسته قانمی ناحق توكللر
خانه ویران ایلر اعدا خاندان مصطفانی
بو همان یردی كی دویماز زینبیم آه و نوادن
باشیمی لب تشنه آخر ذبح ایدر قاتل قفادن
سینم اوسته سینه داغلار ساچ یولار زینب وفادن
سولدورار باد مخالف بو صفالی گلستانی
مایلم قالسون قوم اوسته قانلی نعشیم با حقارت
ایلسون باشیم جداده، آیه‌ی كهفی تلاوت
تا جزاده شامل اولسون حالمه اذن شفاعت
تا چكم اوتدان كناره آغلیانی آغلادانی
كربلا چوخ باصفا دور
كربلا كوی وفا دور
شیعه‌نین ورد زبانی
كربلا دور كربلا دور
استاد كریمی مراغه‌ای
گؤنده ر
بؤلوم لر:
میرزا كریمی مراغه ای
+0 به یه ن
ایها الناس ویرون همتلن رای منه
منی وادارایلیون شركت ایدوم انجمنه
شاعرم شعریله هر مطلبی تحریر ایده‌رم
قاری‌یم آیه‌نی اوز شائنیمه تفسیر ایده‌رم
سیل یخان ایولری بیر هفته‌ده تعمیر ایده‌رم
لادیمز حكمیمه مستاجر اولا یا سكنه
ایها الناس ویرون رای منه
قویمارام شهریده بیر ذره كثافت اثری
گرك آسفالت اولونا شهریمیزین كوچه‌لری
گوره‌سوز اوندا كه آیا سوزیمون وار كسری
من فقط ماهه باش اگسم اگرم انجمه‌نه
ایها الناس ویرون رای منه
قویمارام شهریمیزین بودجه‌سی گیتسون هدره
قویمارام ظلم اولا بیر مو قدری بیر نفره
ییرم شام نهارا یاغ دوگی صبحانه كره
اوزه‌رم باشنی هر كیم سولسه هل پسنه
ایها الناس ویرون رای منه
ایشی ترتیبه سالوم شهره ویروم نظم و نظام
مد امروزیله تعمیر اولا مسجدله حمام
ناقصاتی ایلیوم بیر ایلین عرضینده تمام
هامی بیر دفعه دیسون احسن او رای حسنه
ایها الناس ویرون رای منه
نیه گوركان آلا قبرین بیرینه اللی تومن
نیه دینمور بو جماعت ایشه یوخ بیر یتیشن
بله اولسا قوجا دنیانی دوتار اولماز الن
اُلی گر اوز باشنا اولسا تریخلار كفنه
ایها الناس ویرون رای منه
نه روا شایع اولا شهریده مشروب و زنا
دولدورا تكیه و مسجدلری تذویر و ریا
قویمارام رایج اولا بیر بله تنزیل و ربا
خلق ایچینده گنه مرسوم اولی قرض‌الحسنه
ایها الناس ویرون رای منه
چوره‌گی میوه‌نی بازاردا فراوان ایده‌رم
هویجین آغ كلمین قیمتین ارزان ایده‌رم
اتی قصاب باها ساتسا اونی تاوان ایده‌رم
باسارام ایگنه‌یین‌لر قوسار آتدان تبنه
ایها الناس ویرون رای منه
شاعرم منده قویون صنف رجاله قوشولوم
كارت و پارت و پلوویله پولوم اولسون خوش اولوم
سوخولوم باند ریاستلره غمدن قوتولوم
نولی بش گون قویاسوز سرور اولام مرد و زنه
ایها الناس ویرون رای منه
قویمارام كتلیه آشپز قوخوموش كفته ویره
بیری اصنافی سویوب جنسین آلا سفته ویره
اوغلانا شوخ مه‌مه قزلار اُپوشی مفته ویره
بوسه‌نین هر جوتی قاخسون گرك آتمیش تومنه
ایها الناس ویرون رای منه
منی شهر اهلی تانور من بو ایشین ماهری‌یم
رئسا تك تكی موسا اولا من سامری‌یم
نابلد كی دگولم شهریویزین شاعری‌یم
یوخ خیانت نظریم دولته دینه وطنه
ایها الناس ویرون رای منه
سویرم منده چاتام منصبه آدیم یكله
یاغلی مجانی پلولارییه قارنیم دیكله
ساری رنگیم دورولا بو تیشی قیشلاركوكله
یاخشیلیق دوره سیدی سن منه یان منده سنه
ایها الناس ویرون رای منه
من اگر رای آپارام خوش سیزون احوالیزه
مرحبا طالعوزه شانسوزا اقبالویزا
جد و جهدیله یتورم سیزی آمالویزه
دده سوز سیز منه عورتلریویز مثل ننه
ایها الناس ویرون رای منه
حاضرم هر ایشوز اولسا دیمیون دال چاتارام
بله فكر ایلمیون سیزلری گوزدن آتارام
یری گورمز گوزوم اوندا باشیمی دوز دوتارام
دیمرم گیچدی سودان ایشكیم ایندی منه نه
ایها الناس ویرون رای منه
گله لازمدی حمامدا سو پولی بش قرانا
تا گیده سطح نظافت یوخاری خلق اویانا
شهر حسرت قالا قیللی ... كیرلی دابانا
یاسمن گونده ورا شانه او زلف سمنه
ایها الناس ویرون رای منه
نولی بش گونده كریمی اولا بیر جمعه آقا
داراشا بوغلی پشیك تك بالا قیماقه یاغا
بولیسوز هر ایشیویزده دوشرم من قباقا
ملكم ایندی من اوندا دونرم اهریمنه
ایها الناس ویرون رای منه
كریمی مراغه‌ای
گؤنده ر
بؤلوم لر:
میرزا كریمی مراغه ای
+0 به یه ن
حسنوه ویردی ترقی یوزه دوخسان مینی ژوب
ایوون آباد اولا عالمده مُد ایجاد ایلین
صبریمی طاقتمی ایلدی تالان مینی ژوب
نه دوتور قول قیچی نه یول یرینده یخوری
ایوون آباد ایلدون ایشلری آسان مینی ژوب
پسته‌نین اوستی آچیلدی كیلوسی برمی تومن
ایلدی آغ كلمین قیمتین ارزان مینی ژوب
گتور ای ساقی می نابله مست ایله منی
نازا قویما دورایاقه سنه قربان مینی ژوب
گجه گوردوم یوخودا امر معاشیم دوزه‌لوب
آلمشام قوینوما بیر شوخ بالا جیران مینی ژوب
اویانوب گوردوم اولوب خطه‌ی بغداد خراب
دیدیم ای وای سنه لعنت گله شیطان مینی ژوب
بیزیم آروادداباخور قزلارا كم كم اویانور
گینوب تازه بو بیمان قزی بیمان مینی ژوب
گر چی ایجاد ایلیوبدور بو مدی خارجه‌لی
واقعاً جای تعجبدی مسلمان مینی ژوب
آدی زهرا ننه‌سی فاطمه احمد آتاسی
اهل قرآنیدی بودلار قالوب عریان مینی ژوب
ننه‌سی بیر قیزا ایلوردی نصیحت كی قیزیم
یوزی قویلی اگیلوب سِیچمه بادمجان مینی ژوب
چوخ گوزتله بو لباسین بالا امنیتی یوخ
سنی بیردن گوره‌سن ایتدی پشیمان مینی ژوب
عمله گلسه متاعون داخی گلمز عمله
ایدور اوضاعوی بالمره پریشان مینی ژوب
خیلی مشگلدی اوزین ساخلیا ات گورسه پشیك
دوزه بیلمز گوره پول‌سوز سوبای اوغلان مینی ژوب
قویروغا مشتری یوخ قصابین احوالنه باخ
اوزماندان كی اولوب بیله فراوان مینی ژوب
نه قدر مد گوروسن خارجه سوغاتیدی لیك
بولارین جمله‌سی تك بیریانا بیریان مینی ژوب
اللرون وار اولا خیاطه خانم اُلمیه‌سن
همی دالدان یاراشیر همده قباقدان مینی ژوب
هوسون اولسا گیداخ انزلی‌یه رامسره
لب دریاده ایدر گور نجه طوفان مینی ژوب
كیم خدایا گوره‌سن آچدی بو خلقین یوزینی
نه حیا قویدی نه ناموس نه وجدان مینی ژوب
آدین اسلام قویان خارجه تقلید ایلمز
پوزوب اسلامی نه دین قویدی نه ایمان مینی ژوب
یل اسنده گیدیری فوری گوبكدن یوخاری
گزلین اسراری ایدیر ملته اعلان مینی ژوب
دین و ملت اشاقا گیتدی اتكلر یوخاری
تا گوراخ هاردا ویرر سئرینه پایان مینی ژوب
اقتصاد اهلیدی ایرانلار اسراف ایلمز
همی كم خرجیدی هم مفته هم ارزان مینی ژوب
حیف اولا بو قوجالار مدلاری رسوا ایلدی
قورومش بود قره ایرگنملی باخ یان مینی ژوب
بیزیم ایشكده بیر آز قوشقونا تغییر ویروب
دالی یانمش بودا ایستور اولا حیوان مینی ژوب
خردالوب خردالوب آخر تومان اولدی پاچا بند
قسالوب قسالوب ایتدی دونی دوران مینی ژوب
ای كریمی مدووی سنده دگیش اول ژیگولی
شعر و شاعر مینی ژوب دفتر دیوان مینی ژوب
شاعیر: كریمی مراغه‌ای
گؤنده ر
بؤلوم لر:
میرزا كریمی مراغه ای
+0 به یه ن
ایندیه‌تك بیله بیلوردم خانم
هرزه و هزیاندی ریاست میزی
ایندی اوتوردوم گورورم آی جانم
تخت سلیمان‌دی ریاست میزی
آخ نئجه راحت نئجه اگلشملی
هر نئجه یورقون اوتوسا دینجلی
چوخ یوموشاق سلقلی كیف سورملی
لایق سلطان‌دی ریاست میزی
تخت سلیمان‌دی ریاست میزی
میز نئجه میز اگلشنی جست ایدیر
رند و خرابات و قوی دست ایدیر
بی می و مینا آدامی مست ایدیر
رتبه‌ی شایان‌دی ریاست میزی
تخت سلیمان‌دی ریاست میزی
باخما كیچیك گورسنوری ظاهری
تك بیر آدامدان چوخا یوخدور یری
قوی الیوی آننوا باخ بیر چری
بیر یكه میدان‌دی ریاست میزی
تخت سلیمان‌دی ریاست میزی
میز نئجه میز نشعه‌ی ممتازی وار
موشك و جت تك گویه پروازی وار
باشدان آلور هوشی عجب گازی وار
محفل رندان‌دی ریاست میزی
تخت سلیمان‌دی ریاست میزی
ایلمه غم فخرایله شیش آی ماتان
من رئیس اولدوم كفیمه یوخ چاتان
صدر نشینم دگولم شارلاتان
دردیمه درماندی ریاست میزی
تخت سلیمان‌دی ریاست میزی
واردی عجب معجزه‌سی بو میزین
كور ایدیر اوّلده جلیسین گوزین
نه جلو ایستور نه اوزنگی نه زین
مین‌ملی مادیاند‌دی ریاست میزی
تخت سلیمان‌دی ریاست میزی
دورسا حضوریمده اگر یوز نفر
سایمارام ایشكدی بولار یا بشر
یا بیر اوطاق كتلی یا بیر طویله خر
بیزلره یكساندی ریاست میزی
تخت سلیمان‌دی ریاست میزی
آخ نئجه میز وار نه گوزل نقشه‌سی
اَل قول آچانمور سویورام هر كسی
اُلدویرورم هر كیمی چخمور سسی
مسلخ انساندی ریاست میزی
تخت سلیمان‌دی ریاست میزی
سخت اولا قانون نئجه مثل دمیر
من اونی الده ایده‌رم چون خمیر
اولموشام ایندی ایله روشن ضمیر
مكتب عرفاندی ریاست میزی
تخت سلیمان‌دی ریاست میزی
میز نئجه میز جنگده ارابه‌دی
دللری یاندیرماقا خوش تابه‌دی
خون ضعیفان بیزه نوشابه‌دی
باشدان ایاق قاندی ریاست میزی
تخت سلیمان‌دی ریاست میزی
مؤمن اولا گبر اولا اسلام اولا
یوخ منه فرقی چاتارام قول قولا
دینی فدا ایلمیشم من پولا
دینله دشماندی ریاست میزی
تخت سلیمان‌دی ریاست میزی
بو مثلی خوش دیدی احمد كوسا
ارمنی‌لیق یاخشیدی كبلای موسا
لیك قیامتده پوخی چخماسا
مسند شیطان‌دی ریاست میزی
تخت سلیمان‌دی ریاست میزی
عصر بیزیم عرصه‌ی میدان بیزیم
قصر بیزیم حوری و غلمان بیزیم
نفس بیزیم نعمت الوان بیزیم
معرض طغیان‌دی ریاست میزی
تخت سلیمان‌دی ریاست میزی
ظالمی مظلوم ایلسم ایلرم
حاكمی محكوم ایلسم ایلرم
هر كسی مسموم ایلسم ایلرم
مركز بهتاندی ریاست میزی
تخت سلیمان‌دی ریاست میزی
دائم الیمده ایكی مثقال قلم
ایسته‌سم عالملری ووررام به هم
پولدی پول اُستن یاغوری دم به دم
گورملی دكاندی ریاست میزی
تخت سلیمان‌دی ریاست میزی
ملتی مین مین سویورام دویمورام
دولته دوقوز قویورام دویمورام
گونده اوتوز رنگ بویورام دویمورام
حیله‌ی الواندی ریاست میزی
تخت سلیمان‌دی ریاست میزی
زال منم رستم دستان منم
گیو منم سام نریمان منم
اهرمنم خصم سلیمان منم
مسكن دیواندی ریاست میزی
تخت سلیمان‌دی ریاست میزی
دویمارام اصلاً بله سرمایه‌دن
یوخدی سراغیم خبر و آیه‌دن
سنماسین ای كاش بو میز پایه‌دن
ثروت و ساماندی ریاست میزی
تخت سلیمان‌دی ریاست میزی
بس دی كریمی سوزی قاتما سوزه
سورمه آتون داشلقا قیتر دوزه
چكمه داخی ملتی چوخدا اوزه
یازمالی عنوان‌دی ریاست میزی
تخت سلیمان‌دی ریاست میزی
شاعیر: كریمی مراغه‌ای
گؤنده ر
بؤلوم لر:
میرزا كریمی مراغه ای