بیر زمانه گلیبدی ائو صاحیبی دای مهمانی به یه نمیر

اؤشاخلار بؤیوب جوان اولوبدی، باجی اؤغلو دایی- خالانی به یه نمیر

قدیمین ده بلری ایستیر یغیشا، عقلیمه گلمیه ن گلیر باشا

ایندی حقه قؤیور قارداش قارداشا، دئیر حقم حق اولانی به یه نمیر

بایرامدا بیر دفعه یئیردیک دویو، قئینردی قازاندا جیزلیغین پیی

ایندی بویوننارا ده ینده آبگوشتین ایی، پیتزا آختاریر دای شؤربانی به یه نمیر

یازیرام بو سؤزو من یانا یانا، منی باغیشلاسین اؤ مهربان آنا

ائله بیر ایش گؤردو خانم قئینانا، دای گلینلر قیز آنانی به یه نمیر

عاشق حیدر چوخلو دالا قالیبدی، یامان اؤزون دردسره سالیبدی

بئش گؤن گئدیب نخجوان دا قالیبدی، گئیدوب گلوب دای دویجانی به یه نمیر

اینجیمه بختینن باخ زمانه یه، زمان انسانلارا یول نشان وئره ر

اوشاخ بویوک آنادیلین به یه نمیر، اوشاخلار بویوکه یؤل نشان وئریر

چایلار جوشقون گلیر دنیانی یخیر، یؤخسولوخ چؤخالیب کاسبی سیخیر

کهریزلر قؤرویوب موتوردان چیخیر، لوله لر چشمیه بئل نشان وئریر

گلین سه سین قئینانیا اوجالدیر،غم شه له سی مرد ایگیدی قوجالدیر

اؤغلانلار ساچ قؤیور قیزلار آزالدیر، ایندی بئی گلینه تئل نشان وئریر

آجین مصیبتینن نه بیله ر توخلار،غیرتلی دردینی اؤرکده ساخلار

پالچیخ آراسیندان چیخان قورقوتلار، شاخ مار ایلانلارا دیل نشان وئریر

که ل آزالیب بیر بیرینن دؤیوشمیر، چاقال اؤزون پلنگینن ده ییشمیر

جیرانلار مات گالیب گلیب سو ایچمیر،قارقالار کهلیکه گول نشان وئریر

ستار نه قدر یازسان سؤز گلیر،زمانین بعضی ایشی اؤرگی دلیر

کؤره کن قیناتایا بیر حربه گلیر، سیله سین وؤرماقا ال نشان وئریر

بیر زمانه گلیبدی نابلد بلده یؤل نشان وئریر

گؤن اؤرتادان سؤرا آخشاما یاخین، بئش تومن پول تاپانلار پول نشان وئریر

آخدی گؤزومین یاشی دؤندو عمانه، شیطان دؤنوب لعنت دئیر شیطانه

بئش کلاس درس اؤخویوب اؤنودو دا شبانه، یئددی دیل بیله نه دیل نشان وئریر

کاتیب یئددی قصرین سونونا، سگیزینه دوقوزونا اؤنونا

صرافلار بویونلارین چکیب قینینا،پالان دوز زرگره لعل نشان وئریر

آردینی اوخو
گؤنده ر     بؤلوم لر: بیر زمانه گلیبدی