+0 به یه ن
قاراداغ اولکه سینین گور نئجه دیوانه سی ام
شعر از: محمد گل محمدی
قره داغ اهلی بیلیر من نئجه دیوانه سی ام
بابکین داش قالاسی، هم نبی کاشانه سی ام
ایسته دیم بیر کره ده سیره چئخام بو ماحالی
آیلارین هیجرانینا سون قویا بلکه وصالی
کونلومو چَن بورویوب دوغما دیاردان آرالی
آخی من خان آرازین قان دولو پیمانه سی ام
قاراداغ اولکه سینین گور نئجه دیوانه سی ام
سئومیشم زیره سی قار سهرامانی شاه داغئنین
باش بولاق اورتا قجللی قارالار یایلاغینی
مرد اگیت میدانینی طُرفه گؤزل اویلاغینی
داغئنی اصلانینی سئت قایادان لانه سی ام
قاراداغ اولکه سینین گور نئجه دیوانه سی ام
منی مفتون ائلیین ورزقانین حیواسی دیر
کیوانین آغ قیزیلی، مینجوانین بوغداسی دیر
بیر کلیبر زغالی، بیرده اهر آلماسی دیر
اوشتبین آغ نارینین قئرمزی شاهدانه سی ام
قاراداغ اولکه سینین گور نئجه دیوانه سی ام
بسله نیب تای حضره هر قارا گوز قئز گلینی
وئرمییب هر اوتن اغیار الینه پاک الینی
وئرمه رم یوز لادانه آی بنیزین بیر تئلینی
گول خانیم نازلی صنم گول پری، گول دانه سی ام
قاراداغ اولکه سینین گور نئجه دیوانه سی ام
بو ائلین صنعتینه،حکمتینه باش اوجادیر
چون جوان عاشیق حسین تک اولو شاعر یارادیب
افتخاریم او مرام عاشیقی صنعت کاریدیر
شاهدین داش اولان اوچ قارداشین افسانه سی ام
قاراداغ اولکه سینین گور نئجه دیوانه سی ام
سای حساب سیز بیلیرم کئچمیشینین قهرمانی
بیر مثل چون او وطن خادیمی ستارخانی
نبی تک چوخدی بئله خان بیه، قان اود دورانی
عاشیقی هر تکی ام قربانی هر دانه سی ام
قاراداغ اولکه سینین گور نئجه دیوانه سی ام
شعر گنجینه سی دی اوستاد عاشیق مسکنی دیر
خزرین حجمی قدر فولکلوریندان غنی دیر
شاعرین الهامی گوم گوی چمنی، گولشنی دیر
خان چوپان قوشماسی نین اینجه سی دردانه سی ام
قاراداغ اولکه سینین گور نئجه دیوانه سی ام
صحبت آچدیمسا دئیم تئللی سازین قدرتینی
مین کونول لر داشییر معنوی ائل ثروتینی
میللته دئلغمی آتدیقجا آنار قدرتینی
خان کرم مجلیسینین غم ائوی غم خانه سی ام
قاراداغ اولکه سینین گور نئجه دیوانه سی ام
بیر زمان باسقی ائدیب شاهلیق ائده نلر ائلیمه
خور باخیب دیر بایاتی قوشما گارایلی دیلیمه
او سببدن چکیلیب غم سه گاهین زابلیمه
بیر شکسته قره باغ ماهنی سنین زیل سسی ام
قاراداغ اولکه سینین گور نئجه دیوانه سی ام
دئیرم بیرده گوره یدیم او گوزل چاغلارینی
تویلی بایراملی بوتون کندلی اولماغلارینی
بهمن افسون ائده ن نغمه لی یئغناغلارینی
مرادین چالدیغی اول تئللی سازین شانه سی ام
قاراداغ اولکه سینین گور نئجه دیوانه سی ام
خالقینا ائتسه ستم ظالیم آغیر گون گوزاران
عکس ائدر ماهنی سینا شعرینه نفرتله اینان
ارتجاع ریشه سینه اودلی قلم ضربه ووران
ستارین سرمایه شعرینده کی تازیانه سی ام
قاراداغ اولکه سینین گور نئجه دیوانه سی ام
دینله اشعاریمی ای خالقلارا ظلمت توره دن
ایسته یب هر بیر عوام خلسه سایاق عقلی گؤده ن
بابکین اولکه سینه سورسه خلافت یئنی دن
شمشیره ال آپاران شاعره مردانه سی ام
قاراداغ اولکه سینین گور نئجه دیوانه سی ام
گؤنده ر
بؤلوم لر:
قاراداغ اولکه سینین گور نئجه دیوانه سی ام